وين اللي يحبون الجزل؟؟؟ (مصافحه أولى)

[بادي ابن جريعان]

يا مرحبا يا حمد بن عديمه

صح الله بدنك

اسعدني مرورك واسعدني اكثر انك معجب في القصيده

لاهنت على تعليقك

[النـــادر]

في الصلب حنا اللي حمينا المظاهير*** على الوغى ماحـن نبـدي الرقـادي
هذا الدليل انحـن نسمـى مظافيـر *** وانحن هل الطولات..هـذا وكـاااادي


كفو كفو ..

بادي صح لسانك ملاييييييييييييين ومليااااااااااارات ولا يكفون .
قصيدة ٍ جزله من رجال كفو , وصدقني سعدت كثيييير بإنضمامك في للمنتدى , وعينت بعد
قصيدةٍ تنومس , لاتحرمنا من ابداعاتك ,
لاهنت يابو محسن وننتظر جديدك

النادر

[عبدالناصر آل عبدان]

المشاركة الأصلية كتبت بواسطة بادي ابن جريعان

السلام عليكم ورحمة الله وبركاته..
هذي أول مشاركه لي واتمنى انها تحوز على أعجابكم...
ولاتحرمونا من نقدكم وأرائكم

ياشاجع ابن عويـر مسيـك بالخيـر = قدلك ثمان ايام ويـن انـت غـادي
موتـرك خبـط وأتعبتـك المشاويـر = من راس مرقابـن الـى بطـن وادي
وينك تلاحقنـي تـرا مانـي بخيـر = ابغـي تـرد العلـم لـلـي يـنـادي
الوضع يبن عويـر يحتـاج تفسيـر = الوضع مؤسف وانت تفهـم مـرادي
حنا ال عرجا هيه يـا نافـخ الكيـر = حنـا هـل الفزعـه كعـام المعـادي
يومه زهمنا الشيخ في غزوة مطيـر = ولازهمـنـا الا وحـاديـه حــادي
محـدن تـردى كلبيـنـا مناعـيـر = ومحدن تأخر يـوم نـادى المنـادي
وكلن يحث اللي وزانه علـى السيـر = ايليـن جينـا ثـم غزينـا هجـادي
في الصلب حنا اللي حمينا المظاهيـر = على الوغى ماحـن نبـدي الرقـادي
هذا الدليـل انحـن نسمـى مظافيـر = وانحن هل الطولات..هـذا وكـاااادي
شـوي لكـن حـن نهـد الطوابيـر = شـوي لكـن كنحـن جــن وادي
صغيرنا يصمل..ولـو عـاده صغيـر = ويشيش راس اللي عده في المهـادي
وفقيرنـا يفـرح لاشـاف المساييـر = ويذبح لهم...لو يذبـح ام الشـدادي
وآذانـنـا ماتنـطـرب للمزامـيـر = تطرب على الحرب وصهيل الجيـادي
وايديننـا ماهـي تحفـظ الدنانـيـر = نعطي وننسى اللـي عطتـه الايـادي
ماخلق فينا اللي يحسـب المخاسيـر = وما خلق فينا اللي يخـون المبـادي
ومن ضدنا يبشـر بخـزم المناخيـر = ليـن يهـديـه الله...والله هــادي
ولاضير لو يخطون الاقراب لاضيـر = نصبر على الاقراب صبـر المهـادي
لكـن لاضقنـا نسـوي المناكـيـر = حتى يميز الابيـض مـن السـوادي
نصبر..لكن نشيش ونطيـش ونغيـر = وماحـن نسمـي لاهبدنـا الرمـادي
الكـل منـا وسـط راسـه سعاطيـر = والطيـش فينـا فعـل ماهـو أرادي
اقرب مثل.. لامن قصد (سالم جخير) = فأنكاني مـا ششـت مانيـب بـادي
في ذمتي كنـي مـن القـاع باطيـر = وأحـس فـي دمـي خلايـا جـدادي
ياقوووم يا عنتر ويـا سالـم الزيـر = لامن وصف جداننـا فـي الجهـادي
أفعالنـا تنعـد ضـمـن الاساطـيـر = والوحش يشبـع لانطحنـا الاعـادي
والعذر لامن صار في الحكي تقصيـر = ماقلت غيـر اللـي عرفتـه وكـادي

من عقب ذا برسلك يا شاجع عويـر = للي سكـن بقصـى حنايـا فـوادي
لامن طرت قمت أزعج الصوت واسير = والله مـاعـاد يهنـالـي قـعـادي
تأثيرهـا فـي داخـل القلـب تأثيـر = صوت السديس الا غدا الجو هـادي
وخدودهـا كنـك تشـوف النواويـر = ولون الجسد يشبـه للـون الزبـادي
وطعم الثغر كنـه حليـب المصاغيـر = وريحت نسمهـا كنهـا ريـح كـادي
ونظرة عيونه كنهـا نظـرة الطيـر = مجوعـه راعيـه وقـت الـهـدادي
في دمها خفه.. وفـي طبعهـا غيـر = وفيها دلع وأسلوب ماهـوب عـادي
ومن الدلع مـا تدعـي الا بتصغيـر = والا دعت.. يهتـز حتـى الجمـادي
وعدها تحاتي الحب..وتشك..وتغيـر = وتقول: أخاف يخـون قلبـك ودادي
فلاجيتها قل قـال: مسيـش بالخيـر = الحب عـاده.. لكـن الشـوق زادي
وان ما عذرتي رجلي امن المشاويـر = قولي معـي جعـل الله يعيـن بـادي

وسلامتكم..

بادي



ارررررررررررررررررررررررررررررحب


وبيض الله وجهك من الكويت الى ديار ال سالم بن ناجع في يدمه




ياااوجه وعيل كفيت ووفيت


وششت وشيشت من قراااا القصيده


واااافي وووكفوووووووووووووووووو لبااا والله كبدك




صح لساااانك يالجزل


في انتظار جديدك يالقرم





ودعتك الله




















عبدالناصر

[فلاح بن ملبز]

السلام عليكم ورحمة الله وبركاتة

بادي ابن جريعان

مرحبا ومسهلا

واشكرك على انضمامك الى منتدى وشبكة قبيلة العجمان واتمنى انك اتفيد وتستفيد من هذا الصرح العظيم ولقد سعدنا بأنضمامك الينا

وصح لسانك مليون

ولاهنت على ذا القصيدة الجزله

ولاتحرمنا من جديدك

[بادي ابن جريعان]

مرحباا ومسهلا بالنادر

صح بدنك كثر ما قلت واكثر

وما عليك زود

وانا سعدت اكثر بأنضمامي لمنتداكم

النادر الله لا يهينك على مرورك الكريم

[بادي ابن جريعان]

تبقى يا عبدالناصر

وشهاده من شاعر مثلك اعتز فيها

وانتو ما عليكم زود

بيض الله وجهك على مرورك اللي اسعدني

[بادي ابن جريعان]

عليكم السلام وؤحمه الله وبركاته

تبقى يا فلاح ابن ملبز

وانا اشكركم على ردودكم الجميله

صح بدنك ملالايين

والله لا يهينك على المرور