البحور الحزينه

[مهرة الصمان]

المشاركة الأصلية كتبت بواسطة الجويّر

يانوف ماعدبه تواثيق بحلوف = كل ٍ يشوف الناس بطبوع عينه


والمستحي ماهو سحا ، مستحي خوف = ماهو عزيز النفس نفسه مهينه


يالوف كبدي من زمان الندم لوف = هزت تصاريفه عقول ٍ رزينه

وقت ٍ غدا للزيف والكذب منصوف = وقت ٍ يبي بس المظاهر حسينه

الظلم عادي اشكره شايفه شوف =عزي لمن مثلي حياته رهينه


اركض لغيري واكتم الهمّ وآروف = اسهر وغيري ترقد الليل عينه


غيري شهير بسبّـتي صار معروف = وانا دفين بوسط قاع ٍ دفينه

غيري لخيري كنـّهم عندي اضعوف = ولاحتجتهم كل ٍ ركب في ظعينه

غير الزمان وطعنته طعنة سيوف = انزف وجرحي مالقى من يعينه

عز الله اني شفت مايحرق الجوف = شي ٍ عليه الروح عاشت غبينه

حالي بغربالي غدا حال ابا العوف = مدري متى ذالوقت يفرج سجينه

وماقلت نقطه وسط الابحار يانوف = فسّرت نقطه بالبحور الحزينه

وسلامتكم




الشـــــــــــاعر / ســــــــــــعود رتيبان الجويّر

الجويــــر صح لسانك قصيدة رائعه بروعة كاتبها سلم لنا احساسك وبوحك


لاهنت واشكرك على القصيدة الجزلة


لك تحيااااااتي