النشر والتوزيع بغرض الشهره

[ســـداح]

]السلام عليكم ورحمة الله وبركاته
هذي اول مشاركه لي في هذا المنتدى الرائع
واتمنا انها تحوز على رضاكم واعجابكم



البال ما يمسي ويصبح على خيـر 0 0 0 0 دايم صباحـه فيـه هسّـه وميلـه

تحوفه شطونـه وأديـر التفاكيـر 0 0 0 0 وآخذ معه مرواس فـي كـل ليلـه

صوّرتها من لاهب الصدر تصويـر 0 0 0 0 مابين قدح الزنـد ونـار الفتيلـه

يابادعين القاف .. للقـاف تقديـر 0 0 0 0 ما هو سبيل لكـلّ عابـر سبيلـه

أصبح بعد صفوّاا عليه الطوابيـر 0 0 0 0 ودّه يقصرّها .. وراحـت طويلـه

والنشر والتوزيع خدعـه وتزويـر0 0 0 0 ومصالحن تقضى على أهون وسيله

بضاعة إستيراد وإيـراد تصديـر 0 0 0 0 وأرباحها .. بين العميـل وعميلـه

حطوّه وأشتالوه بعض الشواعيـر 0 0 0 0 يحطّه الأعمـى والأعـور يشيلـه

تزبّروا تحـت السحـاب المزابيـر 0 0 0 0 والوادي الممطور ماسـال سيلـه

البعض يبتاعه .. لجمـع الدنانيـر 0 0 0 0 ثبّت شداده فوق ظهـر الحسيلـه

والبعض يهديـه البنـات الغناديـر 0 0 0 0 ويسجّلـه ل امّ العيـون الكحيلـه

وبكره تقيـم الأمسيـه للجماهيـر 0 0 0 0 وتجلس على الكرسي تفلّ الجديلـه

وتقول أنا لاغيـر لاغيـر لاغيـر 0 0 0 0 الشاعره .. والوافيه .. والأصيلـه

وتكسب له دبكه وصفقه وتصفيـر 0 0 0 وصورة غلاف وحاجتن مستحيلـه

حصيلها شهره سـوات المشاهيـر 0 0 0 0 واللي يقّدمها .. حصيلـه حصيلـه

وأليا قضت وأستسلمت للمخاسيـر 0 0 0 0 عوّد عليها أبليس يومـي شليلـه

يا شاعرات الزيف والدلو ف البير0 0 0 0 ماعاد نعرف فاضله مـن فضيلـه

مانيب أعمّ أهل الوجيـه المسافيـر 0 0 0 0 تكرم يديـن اللـي يمـدّ الجميلـه

شبنا بعد تبنـا وسقنـا المعاذيـر 0 0 0 0 والعذر في بعض المواقف فشيلـه

يااللي ربطت الذيب في مخلب الطير0 0 0 0 لومك على اللي شافك وهـزّ ذيلـه

اسلم وسلّم لي على سالـم الزيـر0 0 0 0 تقاطعـواا ذوده .. عيـال القبيلـه

وســـــــــــــــلالالالالالالالالالالالالامتكم

ســــــــــــــــداح

[عيد بن شدقان]

ســـداح
الـلـــه عليك
رائع والله رائع
لا هنت وصح السانك

[ســـداح]

صح بدنك يالراكد وذوقك هو الرائع ولاهنت

[فيصل بن حجرف]

لاهنت اخوي سداح وصح لسانك

بس لو كانت القصيده لك ياليت تبلغنا عشان ننقلها لمكانها الصحيح

تحياتي

[ســـداح]

صح بدنك اخوي العجمان ولاهنت ونعم ترا القصيده هذي لي
واي قصيده اكتبها مولي راح اذكر اسم شاعرها