فهد بن عبدان الهاجري (( لاتجيب أقصاك ))

[ياميه جديده]

مشاركه اتمنى تعجبكم

وقصيده هالمره بنظري رااااااااائعه
أتمنى ان تنال استحسانكم


(( لاتجيب أقصاك ))


ماأبي الا ترفّق وكلّمني بعدال
.............. لاتجيب أقصاك وتضيق ماعندك دليل

الحكي أخذ وعطا وأنت ماتعطي مجال
...............راكبٍ راسك ومهموم ودموعك تسيل

تنتظر مني الاجابه على قد السؤال
............. كيف أجاوب وأنت عامل علي حالك ثقيل

أول المطلوب مفروض تغرقني دلال
............. ولو توسّع صدرك شوي تكسب بي جميل

العواذل من قهرهم وشولك بالعمال
............. قالوا ان محبوب قلبك لقى غيرك خليل

بثّوا سمومٍ تكسّر أساسات الوصال
............. وأنت كنّك يوم صدّقت ماعندك بديل

ماتقول الا خسيتوا وكذّبتوا .. يمال
............... البلا اللي كل عاقل من أسبابه هبيل

هذا محبوبٍ بخصته ملك ذرب الخصال
.............. شوف من في الكون علقم وشوفه سلسبيل

قل لهم والقاع رمضا يباريني ظلال
.............. قل لهم لأشتدّ برد الشّتا حضنه سبيل

قل لهم معروف عنّه الى من قال طال
.............. حقق اللي قالوا الناس عنّه مستحيل

حبّني حب ابدويٍ عشق صفر الدلال
.............. من غلاها ماتقلّط على غير الأصيل

حبّني حب ابدويٍّ ورث قطعة اجمال
............. شايبه وصّاه فيها وقال أنت الوكيل

برّ بي برّ أجوديٍّ تعدّاه الخمال
............ يوم وصله في جماعته مامثله مثيل

وأنت ماعنّي تباعد لو ان الدم سال
............ توّ عينك بظهر الحق وأشب الفتيل

بوصلك والله لوني أخوض امية نزال
............. موت في عز وكرامه ولا عيشة ذليل



الشاعر/ فهد بن عبدان الهاجري