البعد والمعشوقه

[شبيب ابن شبنان]

السلام عليكم ومساكم الله بالخير

واسمحولي لانقطاعي عن المنتدى


وارجو ان تشفع لي عندكم هذه القصيده وتنال على شي من اعجابكم

يقول

القصيد أحيان يعجبنـي دمـاث عروقـه = وفي بعض ل أحيان ما احبه ولا يهواني
أزعله ويصد عنّـي واعتـزل طاروقـه = ليـن ماعـاد يتعودهـا ولا يجفـانـي
كنّي آحسّـه يتمتـم وأعتبـر منطوقـه = كل شاعر فـي زمانـه نابغـه ذبيانـي
ومثل ترك أهل الضمير السلعه المسروقه = اتـركـه والله يعافيـنـي ولا يبـلانـي
يوم تاخذني طواريـق الغـرام وشوقـه = انتخيبـه نخـوة النعمـان بالشيبـانـي
وامدحه ويسج عن طاري الزعل وحقوقه = واطربه ويقوم يبـدع لاح يـا ليحانـي
وكل مايطري عليـه البعـد والمعشوقـه = قام يلعب في رداة الحـظ ليـن ابكانـي
يا وجودي والجـروح المبطيـه مفتوقـه = كل ما عالجت واحـد زاد فتـق الثانـي
ومثل حب البدو للغيـم وشعـاع بروقـه = كانت تحـب الهـوى وتحبّنـي وتعانـي
سافرت والحكي هذا حول عـام وفوقـه = وواعدتني قبـل ميعـاد السفـر تلقانـي
وكنت اصالح بين جفني وانتفاضة موقـه = والمهم انها تحّرتني وانـا مـا امدانـي
مرني ليـلِ يكرّهنـي الظـلام وذوقـه = لا سقا الله ليلـةِ فيهـا الهـوى ينخانـي
وكل ما قلـت الليـال المقفيـه ملحوقـه = مرني طيـفِ يقـول ان البنـادم فانـي
وكل مابان الصباح وزان فـال شروقـه = احتريها والدّيـر تظلـم وانـا وحدانـي
وقد بغيت اترك علوم أهل الهوى وطروقه =وقمّت أذاكر في كتاب الراحـل الالبانـي
وكل ما تطري عليّ عهودنـا الموثوقـه = قلت لا ماهو صحيح ان الهوى ينسانـي
كنّها مـن قلبـي اللـي حبّهـا منتوقـه = بس قلت بفعلها واقـول صـح السانـي
المهار اللي على حبل الوصـل مسبوقـه = زينها في التفرجه ماهوب فـي الميدانـي

سلامتكم

[ليوناردو دافينشي]

يوم تاخذني طواريـق الغـرام وشوقـه = انتخيبـه نخـوة النعمـان بالشيبـانـي
وامدحه ويسج عن طاري الزعل وحقوقه = واطربه ويقوم يبـدع لاح يـا ليحانـي

الله الله

صح لسانك ياشبيب بن شبنان

حي ذالعين من القصيد اللي يجبرنا على المشاركه وتسجيل اعجابنا

صح لسانك مره ثانيه ولعاد تقاطع

[سلطااان العتيبى]

شبيب بن شبنان







صح لسانك وبيض الله وجهك على القصيده الجزله يالجزل





وتقبل مروري

[بندر]

الشاعر المبدع /

شبيب بن شبنان

وجودك في صدى المشاعر يعد مكسب له

لله درّك

ولاهنت

[نـاصـر]

وجودي والجـروح المبطيـه مفتوقـه...كل ما عالجت واحـد زاد فتـق الثانـي

أبن شبنان

صح لسانك

شاعر جزل ولاأزيد على الاخ ليوناردو دافنشي في ماقال : حي ذالعين من القصيد اللي يجبرنا على المشاركه وتسجيل اعجابنا

[فهيد بن عصيدان]

ابن شبنان

صح لسانك يامبدع

[مـحمـد]

صح الله لسانك ولاهنت

[شبيب ابن شبنان]

ليوناردو

حياك الله

وصح بدنك

ومرورك يزيد من جمال القصيده انت واللي مثلك


لاهنت طال عمرك

[فلاح الذروه]

صح لسانك يابن شبنان

وقصيده وافيه ولاهنت

[علي بن فطيس]

مرني ليـلِ يكرّهنـي الظـلام وذوقـه
لا سقا الله ليلـةِ فيهـا الهـوى ينخانـي
وكل ما قلـت الليـال المقفيـه ملحوقـه
مرني طيـفِ يقـول ان البنـادم فانـي



السلاااااام عليكم ورحمه الله وبركاااته



صح الساااانك ولاهنت



وقصيده جزله من شاعر جزل



وتقبل تحياااتي



علي بن فطيس العجمي