الى ابي مع التحيــــــــــه

[عزوف]

لي الفخر وان قالوا أنك كحيلان .... طيبك رفع راسي بالاقصا والادنين



فيك افتخر بالفعل ياطير حوران .........وأعتز وان قالوا بطاريك نعمين



يابوي لو اوصف لك باشكال وألوان...... ماقالواالعربان بالوصف تكفين



حرام مايوفيك قافي... والاوزان .......عجز قصيدي وان تعدى الملايين



يابوي حملك مايشلنه ... أوطان .............ولا تهز فعول طيبك رديين



الطيب ورثك ماشريته ... بالاثمان .....متسلسل من نبع ناس... عريبين



جدييني اللي بالصخا طيبهم ....بان ...طيب عليه الله وخلقه شهيدين



ذيب القفر جدي وجدي .. ابليهان...... ابوك وخالك مكرمين المساكين



كل ذكرهم بالجمايل ... ولأحسان .....أفعالهم تذكر على العسر واللين



ولك عزوة بالجود والفعل شجعان.... ووقفاتهم بالضيق تعرف من سنين



مافيهم اللي فيه بالطيب نقصان....... قول صحيحٍ ولا يبي له براهين



الطيب طيب ولا ينقص هل الشان.... كل القبايل في صخا الطيب وافين



والطيب ساسك وأنت للطيب ديوان ...ياساسي الصافي ونبع الكريمين



لبست من طيبك على الراس تيجان .....تاج قوي ولا تهزه ... سلاطين



ولي الفخر وان شلت اسمك بعنوان ....ويقال لي يابنت ريف الضعيفين



ديوان بيتك صار مدهال ضيفان ............ولا قفلت بيبان بيتك بقفلين



يابوي كلٍ شاهد لك بوكدان ...............ديوان بيتك فاتحه للشكيلين



العود يوجدبه مع دلال رسلان.......... لضيوفك اللي زاهمينك وعانين



ويفرح بك الطرقي إليا جاك عمسان .....ماقلت عندي للخساير موازين



صدرك وسيع وخاطرك دوم ماشان ....يضحك حجاجك في وجيه المزابين



تدمح خطا المخطي ولو كان ما كان.. وتحشم هل الزلات لجل.. العزيزين



ومن جاك ضايق مامشى منك زعلان ....يروح ... مايشكي ولا بخاطره شين



كم من سجين راهنه (شيك).. ديان... واطلقت قيده عن قيود المساجين



ماخاب من يزهمك في ضيم الازمان.. تشيل حمله لو غدا الحمل حملين



يابوي بقلوب الشكيلين لك شان ........والكل نعمٍ لك من أول وذا الحين



وبالطيب تمدحك الجماعه وجيران...... واللي قريب الحد واللي بعيدين



وشلون ماافخر فيك ياذرب الايمان.... وطيبك ينومس ياسليل الشريفين



ياجعلني مابكيك ياطير حوران .........ياللي فعولك ترفع الراس والعين

للشــــــــــاعره والمبدعه سحايب خير