ماضي العضيمان.......... وأجمل أُنثى

أشهب الـلال · #1 13-10-2005, 02:55 AM

أجمل أُنثى

ياصغيره غرّك العـز والقصـر الظليـل=فوق سجـاد المعـزه وبكفـوف الـدلال
اسمعي لابارك الله فـي الحـظ البخيـل=والرفاهيـه وفهـم العـرب والانحـلال
قبل اعرفك مااعرف الحب واقنع بالقليـل=ومن عرفتك وانتي كنوز مال وراس مال
الخطا ماهو خطا عاشق الطرف الكحيـل=الله اللي ميّـز الحسـن ويحـب الجمـال
والجميله يوم تعشق لهـا عاشـق جميـل=تفتخر به زود لاصار من روس الرجـال
اعشقيني عشق (عفرا) لـ(عروه) والدليل=اني آعشْقك وظلمك غدى عنـدي عـدال
جعل ربي مايفـرق خليـلٍ مـن خليـل=لين يوصل كل واحد علـى حـد الهبـال
بنهبل بك لين كـلٍ يعـرف انـي هبيـل=وانتي انهبلـي بحبـي وزوديهـا خبـال
خلّي العذال تمسـي علـى حـر المليـل=وان بقى ثلثٍ من الليل ياحلـو الوصـال
ودي بحب المعنّـق وشـرب السلسبيـل=والظما مايقطعه (مـا) شفايفْـك الـزلال
كل مااشرب ودي اظما واظمك حيل حيل=ودي نحل القضيـه ولـو طـال الجـدال
الوعد مقصورة العشق والمقصـد نبيـل=وش نسوي والله ان حن نبي الدرب الحلال
الهوى ناسه مجانين جيـلٍ عقـب جيـل=واكثر احصائي ضحاياه من قيـلٍ وقـال
ألبسي في كل طلعه معـي آخـر موديـل=ابغي افقد لا انثنا عـودك الناعـم ومـال
الله الله ماازين الطول وأومـاي الجديـل=وانهزاعٍ بين خطـوه وخطـوه واعتـدال
وخصرك المَزْوي يخلي الرجال بلا دليل=وردفك وصدرك وجسمك وحلو الانعزال
والعيون الدعج والخـد والعنـق الطويـل=والكفوف المترفـه والمعاضـد والكمـال
لبّـا والله قلبـك وقـدّك الغـظ النحيـل=يا اجمل انثى غطت الحسن في بشتٍ وشال
سوقي الاقدام صوبي وعضـي بالشليـل=اسرعي مشتاق لك حيل مافينـي احتمـال
ان تضايقتي من الليل قولـي لـه ياليـل=وان صلح لك تالي الليل قولي عال عـال
وانتخيبي ويغدي (وادي العجمـان) خيـل=عاشقك ساسه على العز عمّـان وخـوال
ليلٍ وخيـل وغـرام ومياديـن وصهيـل=لعنبو من ردني وقتها (انا اخـو العيـال)
قولي : الحقني يا(ابومبارك) بقوّه وحيـل=والله ان تعقد لك حبـال وتقطـع حبـال
وانتزع لك راس شيخٍ من الوزن الثقيـل=واقطع الفرجه واعـل المواريـد الطـوال
انتي ام الروح والروح ماغيـرك بديـل=يعني انتي بس من صال في قلبي وجـال
رزتك هيبة حكومـه ومنطوقـك ذليـل=رمشك احيان يتجرا وبعـض احيـان ذال
ياصغيره..لحظه! افكاري الشـرّد تخيـل=ودي اسولف شعر دامنـي واسـع خيـال
خاطري في قاع مافوقها سـدر ونخيـل=ولا تمرّك لافتات (انتبه معبـر جمـال)
قاع شبعانه من الـورد والانهـار سيـل=ماتشوف الا حمامـة مراسيـل وغـزال
لانظرتك وانتشيت الهوى الطلـق العليـل=ثـم تشابكنـا الايـادي وغنينـا يـالال
في جبل ناخذ لنا(سويت) في افخم اوتيـل=شرفته على البحر والبحـر خلفـه جبـال
مشهد (الجو وغرامي معك) مالـه مثيـل=تعجز انتاجات (هوليود) ترسم لـه مثـال
جعل يومٍ فيـه فرقـاك يبقـى مستحيـل=والجفـا بينـي وبينـك مايلقالـه مجـال
يابعد روحي وياراس مالـي والحصيـل=الوصيه..لا انبرا الحال زورينـي بحـال
ولنجرحت من الزمن يوم واعلنت الرحيل=واصليني واستمري معي علـى اتصـال
يابعد مـن هـز قلبـي ولا خـلاّ نزيـل=ويابعد من حط وسط المعاليـق الرحـال

وسلامتكم

لشاعر ماضي بن مبارك العضيمان

وفي الختام: بعد الأتصال بأبو مبارك أوصاني أن أنقل لكم تحياته وسلامه لكل أعضاء وضيوف مُنتدى العجمان، مع نقل ما أمكنني من قصائده.

ولكم أطيب تحيه

أخيكم

المعقب · #2 13-10-2005, 03:11 AM

اشهب اللال
صح لسانك ولسان شاعرها
تقبل مني كل الشكر والتقدير
تحياتي

مهرةٍ اصيلة · #3 13-10-2005, 03:31 AM

ولنجرحت من الزمن يوم واعلنت الرحيل=واصليني واستمري معـي علـى اتصـال
يابعد مـن هـز قلبـي ولا خـلاّ نزيـل=ويابعد من حط وسـط المعاليـق الرحـال

صـح لسـان ..

ماضـي العضيمـان ..

ابيات في قمه الإبدااع ..

مثـل مايعودنـا دايم ..

الجـزل مايأتـي الا بالجـزل ..

أشهـب اللال ..

ياسـلام عليـك ..

إختيـار يجنـن ..

بيض الله وجهـك ..

إختياراتـك دايم غيــر يا أشهـب

وفي إنتظـار قصايد الشاعر ماضي العضيمان بفـارغ الصبـر

كل الود مني لك ..

إختـك .. مهرةٍ أصيلة

عيد بن شدقان · #4 13-10-2005, 04:34 AM

اشهب اللال
الله الله لله

نقل رائع من عضووو رااائع
وصح السان ابو مبااارك
ولاهنت وتسلم يالقرم
اختيااار جزل
ولك كل الشكر

أشهب الـلال · #5 13-10-2005, 06:55 AM

المعقب

الغالي والعزيز

ولاأنت

أشكُرك على المرور والمُشاركه

تقبل تحياتي

فزاع · #6 13-10-2005, 07:10 AM

اشهب اللال

صح لسانك ولسان راعيها

ومشكور على النقل

المارد الشعري · #7 13-10-2005, 07:38 AM

لبّـا والله قلبـك وقـدّك الغـظ النحيـل=يا اجمل انثى غطت الحسن في بشتٍ وشال
الا والله لبا قلبك يااشهب اللال على اختياراتك اللي دائما مميزه اشكرك اشكرك ياملك الذوق
اختيار موفق والله يعطيك العافيه0حبيب البي يااشهب اللال0000اخوك المارد

وانتخيبي ويغدي (وادي العجمـان) خيـل=عاشقك ساسه على العز عمّـان وخـوال

ونعم0صح لسانك يابو مبارك والله مانت بهين قصيده تدل على ان قايلها شاعر شاعر شااااااااااااااعر

اتمنى اقراء لك المزيد

الله الله يا اشهب اللال لاتبطي بالثانيه0في انتظارك0

لك شكري وتقديري

أشهب الـلال · #8 13-10-2005, 05:33 PM

مهرةٍ أصيله

ووجهك أبيض يالغاليه وأشكُرك على المرور والمُشاركه

والحمد لله أنها أعجبتك ، وأن شاء الله أكون عند حسن الظن دائماً.

وأما بالنسبه لأبو مبارك

(الجزل ما ياتي ألا بالجزل) نعم أبو مبارك شاعر قوي، وأحرجني بالأمس عندما ألقى بين يدي باقه من القصائد الرائعه لأختار منها ما أُريد فــكُل واحده منها أجمل من الأُخرى, ، ،

أعتذر عن الإطاله

ولكِ مني كل الود

تحياتي

أشهب الـلال

ناصر بن فالح · #9 13-10-2005, 05:59 PM

السلام عليكم ورحمة الله وبركاته

صح لسان ابومبااااااااااااااااااااااارك مليوووووووووووووووووووووووون

ولاهنت اشهب الال على القصيده والنقل المميز

عـزام · #10 13-10-2005, 07:15 PM

اشهب اللال

اختيار اكثر من رائع

وابو مبارك شاعر ما يحتاج شهاده

صح الله لسانه

وتسلم يمناك لا عدمناك