محمد بن فهد بن محمد و (الشيخ عجمي وبيت الشعر)

[صماد]

قصيدة لـــ والدي/محمد بن فهد بن محمد منيخر اطال الله في عمره
قصة القصيده ان الشيخ عجمي بن خميس بن منيخر رحمه الله كان من اكرم العجمان وكان له بيت شعر مبني عند بيته الي في حنيذ وكان مفتوح لعابر السبيل والضيف وكان الله يرحمه يبنيه كل مادخل فصل الشتاء. وبعد مماته استمر ابنائه على هذا المنوال عسى الله ان يطرح فيهم البركه ويوفقهم على ماسارو فيه.
وحصل مره من المرات عند دخول فصل الشتاء اللذي كان بعد وفاة الشيخ عجمي بأن قامو ابنائه ببناء بيت الشعر كالعاده التي اعتادو عليها من والدهم الشيخ عجمي رحمه الله .
ويوم شافه ابوفهد هاضت قريحته بهذه القصيده حيث ذكره بيت الشعر بأبن عمه
ويقول فيها

البارحه عيني حربها المناما=لا واهني اللي منامه تهناه
من يوم شفت البيت شيد وقاما=بيت الشعر باقي وراعيه خلاه
يابيت يالي مدهلٍ للنشاما=من طيب راعيه الرجاجيل تنصاه
يابيت وين اللي جلس فيك عاما=واليوم لا جيناك ماعاد شفناه
في مجلسه مثل القمر بالتماما=يازين شوفه لا جلس فيه زيناه
لاشفت بيته زاد همي هياما=ذا مجلسه على دلاله ومركاه
نقض جروحٍ في ضميري اقداما=وقلبي من اللوعات كافيه ما جاه
ذكراه تبقى في خيالي دواما=بيته يذكرني وانا ودي انساه
بدر الزمان الي يبوج الظلاما=شيخ الشيوخ الي جزالٍ عطاياه
تاج المراجل والفخر له وساما=كل المكارم والشرف من سجاياه
مكانته فوق الرجال السناما=منزاله اعلى المجد ولا تعداه
ما جادت الدنيا بمثله حراما=ولا صار مثله فأول الوقت واتلاه
لبو خميس فالمعالي مراما=الجود والامجاد فعله ويزهاه
ابو الارامل والضعوف اليتاما=الفضل والمعروف عادات يمناه
وفي روضة المسجد رديف الاماما=الدين والدنيا كسبها لمبداه
من عاد عقبه في الامور العضاما=وين الذي مثله يسوي سواياه
مثله يشيل المعضلات الجساما=وافي خصايل كاملٍ كنه إياه
لابرطم الضحاك عقب ابتساما=وريقه نشف ماعاد بلل شفاياه
ابوخميس يوم شد الحزاما=لا صعبت القاله علينا ذكرناه
الشيخ راح ولا يفيد الكلاما=لا واخساره فقد مثله وشرواه
عليه صندوق الضماير حطاما=حطام قصرٍ خرب الوقت مبناه
وعليه زرع القلب غادن صراما=صرام زرعٍ واقفٍ ماه ماسقاه
عليه مني كل يومٍ سلاما=عزاه له من وحدة القبر عزاه
ليته يجينا منه رد العلاما=وليته يجيه الخط منا ويقراه
يفرض علي الحق صبري الزاما=يالله صبر ايوب من شر بلواه
مادامت الدنيا لخير الاناما=الدايم اللي كون الكون وانشاه
دنيا تجي وتروح مثل الحلاما=وغاراتها تاتي الخلايق مفاجاه
خيبه على الدنيا عساها العداما=وخيبه على من حطها راس مغزاه
زين الليالي زيف ماله دواما=مثل السراب اللي تلالى بمضماه
وصلوا على الخاتم صلاة وختاما=اعداد ماهل المطر وانتثر ماه

محمد بن فهد بن محمد بن منيخر

[فيصل بن حجرف]

الله يرحم الشيخ عجمي بن خميس بن منيخر ويسكنه فسيح جناته
الشيخ اللذي بكى له الصغير قبل الكبير حين وفاته واللذي له مواقف مع جميع العجمان من ايام شبابه والى ان صار وزير الملك خالد بن عبدالعزيز رحمة الله عليه
ابو خميس كان أب الجميع وأذكر ونحن أطفال كيف كان يقوم بعمل المسابقات في كل عيد وفي كل مناسبه وكيف كان يقوم بوضع الجوائز للجميع وحتى الخسران ياخذ جائزه احببناه ونحن اطفال واحببناه اكثر حين كبرنا وغدونا شبانا, ومازال حبه في قلوبنا وفي قلب كل من عرفه من طيبته وكرمه اللا محدود ووقفته مع كل محتاج وكل سائل ووقفته مع أهل الكويت ايام الغزو العراقي ووقفته مع كل صاحب حق , كيف لا وهو الشيخ ابن الشيوخ ابوه خميس وجده بطي وجد جده منصور بن منيخر
رحم الله الشيخ الأمير وأسكنه فسيح جناته وغفر له
وصح لسان العم ابوفهد واطال الله في عمره ولاهنت اخي صماد على هذه المشاركه اللتي تستاهل التثبيت والله يطول في عمر الوالد ويحفظه

[صماد]

اخي فيصل لاهنت على هالكلام الي اعجز عن الرد عليه لانك كفيت ووفيت
والله يطول عمر والديك ويعافيهم ومن تحب
تقبل فائق الاحترام والتقدير
اخوك صماد

[الباشا]

الاخ الكريم

صماد

رحم الله الشيخ عجمي بن خميس واسكنه فسيح جناته

وصح لسان والدك في هذه القصيدة الجزله والرائعه في معانيها


ولك الشكر والتقدير

[عـزام]

الاخ الكريم صماد


الله يرحم الشيخ عجمى بن منيخر ويسكنه الجنه


وقصيده اكثر من رائعه فى من يستحقها


صح الله لسان ابو فهد مدد لا عدد

ولاهنت يالقرم

[أشهب الـلال]

رحم الله الشيخ عجمي بن خميس

أبو خميس فقيده على قبيلة العجمان بِأسرها ، وأسأل الله أن يُسكنه فسيح جناته

وبالنسبه لأبو فهد شاعرنا وعمنا الله يطول في عمره ويبقيه ذخر وصح ألسانه

لاهنت أخي العزيز

صماد

لك مني أطيب تحيه

أخيك

[صخر]

الله يرحم الشيخ عجمي ويسكنه فسيح جناته

وصح لسان العم ابوفهد والله يطول بعمره

والله لا يهينك على نقل القصيده الجزله والمؤثره


تحياتي

[بيطار]

تاج المراجل والفخر لـه وسامـا=كل المكارم والشرف من سجايـاه
مكانته فـوق الرجـال السنامـا=منزاله اعلـى المجـد ولا تعـداه

رحم الله الوالد ابو خميس وغفر له ولوالديه والطيب ليس مستغرب على منهم أهل له

وصح لسان ابو فهد وطّول الله في عمره

وتسلم لي اخي العزيز صماد

اخوك

بيـطار

[فزاع]

الله يرحم الشيخ عجمي بن خميس كان اب للصغير واخ للكبير والله يبيحه كان دين وعقل .. وصح اللسان الوالد والعم ابوفهد والله يطول بعمره ويخليه لنا

[بن عجمـــــــــــــى]

اللـــــه يرحمه من شيــــــــــــخ
ويسكنه الجنة
وعلومه غانمـــــــه وامجاده ومواقفه طيبـــــــــــــة
يشهد له التاريـــــــخ
والله يرحم الشيخ بن الشيخ
واب الشيــــــــــــخ
وجعل دواوينـــهم عامــــــــــرة
وعسى الله يعزهــــــــــم
لاهنت اخى صماد على مااتحفتنا به
فى هذا المــــوضوع
وصح لســـــــانك ومن قالها
والبـــــــــــقا للجميــــــــــــــع