والله إني كنت ألوم اللي يضيق إن غاب خلّه
-------- لين جرّبت المحبه والفراق وقلت توبه!!
لعنبو . جد المفارق فيه هم . وفيه ذلّه
--------- أثر كل الحب لذه والفراق أكبر عيوبه
أمس . فارقت الغلا ومفارق الخلان علّه
------- والعلاج الوصل لاتبلش طبيب ولا حبوبه
الزعل هو سبّة الفرقا يهّز الحب كلّه
--------- ليتني طولّت بالي قبل لا يعلن غروبه
واهني اللي وسيع الصدر صدره وسع فلّه
-------- غلطة الصاحب تجي وتروح ماهي بمحسوبه
عارفٍ قدره وقدر اللي يحبه في محلّه
-------- ذاك نفسه لا حشا ماهي علي الحب مغصوبه
سامح الله طبعي اللي للتغيّر يالعلّه!
-------- قاضبٍ خلك عزيز . ولين صارت لي عقوبه
ليش تحسب غلطة الصاحب علي الصاحب مذلّه !؟
------- ليش ماتحسب ميانه لوتجي عشرين نوبه ؟؟
لا وربي كنت أحبه حيل مادوّرت زلّه
------ لا تشكك في غلاه . ولا تساعد في هروبه
لايمي . قبلك تعبت ألوم شعار المجلّه
------- وكنت مؤمن في مقولة أعذب الشعر الكذوبه
وأثر كّلٍ في حياته له تجارب مستقلّه
------- وأنت لا تشره علي . مثلي . وتبلا لك بحوبه
كان جابتك الحميّه روح له تكفا وقلّه
------- لا يخليني وإذا ودّه يخفف من ذنوبه
يستخير وله غلا قلبٍ صدوقٍ ما يملّه
------ فدوةٍ له كل قلبي من شماله لي جنوبه
يوم قفّا والخفوق يفوح عقبه فوح دلّه
------ وسط وقدة واحدٍ عزّ الشتا والسهر دوبه
لاتقهوى . بارده من برد فنجاله وزلّه
------- ثم قرّبها علي جال الجمر وأرهى شبوبه
وين يدله هالخفوق وكل مايدله يتلّه
------- طاري اللي ياكثر ما أتعبت رجلي في دروبه
لاطرى . جريت ونّة من بلاده مستحلّه
------- مثل ماراحت بلادي مع شعارات العروبه
كل هاجوسٍ يجيبه جعل شعري فدوةٍ لّه
------- وأعذابي . كل ما جابت لي الجبله هبوبه
مشغلٍ قلبي بحبه دون خلق الله . من الله
------ هيه . ياللي ممتلكني حسن وأسلوب وعذوبه
ماسمعت إن الخوي له بالخوي تسعين زلّه
------ وأنت طوّف زلتي ياعل تفداك اللعوبه
صاحبي سيف الهجر . لاصرت تقدر لاتسلّه
------ ماتظن العفو عند المقدره أفضل عقوبه ؟؟
أيه أنا اللي كنت ألوم اللي يضيق إن غاب خلّه
------- لين . جرّبت المحبه والفراق وقلت توبه !!
قصيدة للشاعر حمـــد السعيد أتمنى أن تنال إعجابكم
13-11-2005, 08:18 PM
العرض الشجري