القصة تتكلم عن شهر عسل للعروس شهووووووووووووووووووووووووووووووووودة
في يوم 13-5 كان موعد زواج شهووووووودة وكان زواجهم عائلي وبسيط ماعزموا أحد غير اخواتها <<<<وعاد ذولي يبيلهم عزيمة
المهم هذا اليوم كان أتسع يوم في حياة اختنا شهد تسألون ليه؟ لإنه كان يوم زواجها وبتعرفون ليه صار كذا اذا كملتوا ا لقصة
وشهد كانت بنت خجولة جدا وعلشان كذا أهلها ماحطوا لها زواج وحفلة كبيرة قالوا وشو له الخساير وانتي ماتبين تنزفين بنحطه عائلي المهم البنت وافقت وخلوا العرس عائلي ولما جت الساعة 11 دخل أبوها ومعه المعرس والله لا يوريكم كيف كانت شكلها لون الوجه طلع أخضر بسبة الحياء وطلع باللون هذا من المكياج .
وأما دقات قلبها هالضعيفة القلب يخبط في باب المدخل ويرجع المهم كانت حالتها خطيرة جاء المعرس وسلم عليها وقبلها من جبهتها زي مايسوون عادة وهي المسكينة من عقب صقعة هالحبة وهي رايحة وطي وجابوا أهلها تورتة الفرح وكانوا مرة متكلفين في هالأمور ولحظة مسك يدها لقاها لوح مو يد‘‘ متجمدة ياحياتي مع الروعة ويالله قطعوا الكيكة وكلها هو ولا هي يوم بغت تاكل بغت ترجع (الله يكرمكم) بس مو لأن الكيكة طعمها شين .بس تعرف إذا الواحد صار مرتاع كيف تكون شهيته .الشاهد أن هاللقمة مرت على خير وبلعتها بعد جهد جهيد من التعصر وتقلبات الوجه وبعدين صوروا والحين خلاص بياخذها الى البيت(القفص الذهبي)وهي في السيارة كانت تفكر هي بتروح الان الفندق أو المطار وعلى طول يسافرون المهم ودها لبيت بابه مردود وصجة وفيه دهرة وقف عندها قالها يالله انزلي هذا بيت اهلي وترى أخواني وأخواتي ورجالهم كلهم مجتمعين عندنا وبيمرحون علشان بكرة إن شاء الله بعد صلاة الفجر نمشي لأبها البهية <<<ترى هو الحين يقاله بيبشرها
ونستانس ياحلــــــو<<<ياعيني ع الاسلوب وهي المسكينة كان وقع الخبر عليها أشد من انه يوصف المهم قالت مايخالف يمكن استانس ونزلت وهي ترسم لإستقبالهم قالت اكيد أنهم عاملين حفلة صغيرة لي..وتوها داخلة من باب البيت ويستقبلها ولد أخته بمزعة كورة محت كل معالم الفرح من وجهها وقامت المسكينة تتعبر وطلع وجهها تحفة وكملت المشوار ودخلت الصالة ولقتها مليانة من اولها لآخرها حريم متسدحات وعيالهم الصغار اللي نايم واللي يصيح المهم دخلت وطارت بوهتتها وقاموا يسلمون عليها والعيال الصغار يلمسون فستانها ويطلون عليها ويطقونها وينحاشون واللا هي المسكينة شوي وتنهار وقالت: حشا مو عروس مهرج والأمهات يصارخون ينادون الصغار تعالوا شوفوا لعرو س الجديدة<<<<شكلها أول زوجة ولد لهم مو مطلقة ولا أرملة
وكانت تصف حالتها وتقول:كنت شوي وأصفق اللي قدامي ..ولا وحدة منهم كانت مسوية لي ذوق قامت جابت لي كأس عصير ومن شافوه الصغار قاموا يصيحون يبونه ..وماعد طلع للعصير طعم وكانت المسكينة تشرب هالعصير وكأنه سم ..وزوجها الموقر أول مادخلوا لف على طول الملحق مجتمعبن انسباه وأخوانه وكمل معهم البلوت .. وصعدت غرفتها وبدلت ملابسها ..ونزلت لهم مرة ثانية وتقول أشكال أهله ماتنوصف يوم دخلت عليهم غير أنهم متسدحين والحب (الفصفص) منثر على الأرض وكان فيه ولد صغير عمره يجي سنتين وكان يصيح وقامت أمه تستخف دمها وقامت تطق شهد بمزاح وتقوا آآآآآآه ياشهد تطقين عبودي وهي شوي وتنحاش وتقولهم بروح أنام قالوا لها الليلة صباحي إن شاء الله.واحنا في الطريق اصفقيها نومة ‘‘وتنتظر ذا السهرة تخلص وعيالهم فرحانين فيها أكثر من زوجها ومابقى وردة في حديقة بيتهم الا وعطوها اياه وتعالوا شوفوا أنواع العطاس والدموع والصداع لإن العروس عندها حساسية في الأنف .
ولما أذن الفجر طلعوا الرجال يصلون والحريم بدوا يستعدون يشوفون إن كان فيه شئ ناسينه ولا ومن وساعة الوجه يقولون لها من قدك تسافرين شهر العسل بعد زواجك بيوم وراحت تجيب شنطتها اللي جهزتها هي وامهـــا وراحت سرحانة في ذكرياتها وهي تجهز شنطتها وايش اللي كانت تتمناه لشهر العسل .
الشاهد ركبوها في جمس الحريم وفاتكم الإزعاج اللي صار قبل مايركبون وهم يقسمون الأنفار في السيارات سيارة للصغار والعاملات وسيار للبنات سيارة للحريم اللي كانت شهـــد معهم وكانوا شايلين المراتب ودحجوني معهم وكانت العروس الجميلة شهد في اللحظة هذه عبرة تروح وعبرة تجي .وعاد تدرون البارح كله سهرانين فركبوا ومباشرة تسدحوا وناموا وتعالوا شوفوا أنواع الترفيس واللي يخنبق ويخربط وهو نايم وهي الضعيفة جالسة تهز ماجاها النوم وهي رايحة في هواجيس وذكريات أحلامها قبل العرس أنها بتروح في يخت هي ويا زوجها ولا كانت تبي اليخت تقول احسن من السفر للدول وازعاجها كانت تبي جو شاعري في البحر ورومانسي بس المسكينة صارت في جمس فيه 13 نفر وإزعاج شخيرهم وغير الترجيف اللي تحط رجلها في وجهها واللي تجيها الوسنة وتقعد تصارخ بس ربي رحم شهد لإنها بغت تطب من شباك السيارة وتنتحر المهم أن ام زوجها رقبتها توجعها قالت ياشهد الله يعافيك بنام على رجيلاتك ورضت العروس التعيسة طبعا ونامت الخالة على رجولها وهي تناظر راس خالتها ودها تقسمه نصفين ولما وصلوا مدينة ليلى ونزلوا للمحطة يصلون الظهر ويتغدون قالت أبي أروح للسيارة اللي فيها زوجي لإن اللي كان يسوق سيارة الحريم أخو زوجها حسب ماقالوا لها لإنها اصلا ماشافت زوجها عقب تقطيع الكيك ولما راحت له لقته هو اللي يسوق سيارة العفش والصغار والشغالات يعني أنواع الخيااااااااس ويوم درت ان هذا مكان زوجها استسلمت ورضت بالامر الواقع وصلّوا وتغدوا.المهم كملوا طريقهم بسلام ولما وصلوا وادي الدواسر تشوف ذا اللي يسوق بهم مابقى أحد ماسأله عن عين كبريتية يقال ان أي واحد يتسبح فيها يشفى من أي مرض هي بعد ما عرفت انهم بيروحون لهذي العين قالت شهر عسل جماعي وتسبح جماعي بعد
وصلوا العين وقالوا لها انزلي تسبحي وحاولوا فيها بس كانت رافضة قطعيا هالموضوع وقعدت تتفرج عليهم والكل كان يتسبح وعلى فكرة ترى هالعين مقسمة قسم رجال وقسم نساء ومن شدة الزهق راحت لسيارة زوجها علشان توسع صدرها شوي ولما وصلت السيارة لقته معلق ثوبه على مراية السيارة وطاب معهم يتسبح ورجعت لمحلها واتصلت عليها أمها في الوقت اللي كانوا بيطلعون فيه فكان إزعاج وحوسة قالت أمها شهد وينك فيه بالمطار وش هالإزعاج ردت شهد بكل حزن لا وش مطاره أنا في وادي الدواسر والإزعاج ذا إزعاج اهله توهم متسبحين الأم من الصدمة قفلت السماعة وركبوا مرة ثانية السيارت وانطلقوا ليكملوا المشوار وصلوا أبها على المغرب تقريبا وكان الجو رائع استقبلتهم أبها كعادتها بالامطار وبالهواء العليل .
ومشوا وراحوا على طول لفلة كانوا مستاجرينها وكانت هالفلة قسم للرجال وقسم للنساء يعني بتنام معهم المهم نزلوا وعلى طول حطوا راسهم وناموا ويوم جت الساعة عشر قالوا نبي نروح نشوف فعاليات المهرجان والعروس المسكينة دايخة مانامت أسبوع قبل العرس بس أنا متأكدة لو أنها عارفة أن زواجها كذا كان نامت شهر متواصل قبل الزواج ..وهالمرة وقفت في وجهيهم وقالت مابي اروح للفعاليات انا تعبانة وبنام قالوا ابد ان مارحتي مارحنا هذي السفرة لك وتقعدين في البيت وحلفوا عليها وراحت معاهم للفعاليات والجميع استانس وانبسط الا هي وجابوا لهم عشاء ولا تعشت تعرفون عاد سهر ونكد وضيقة صدر تسد النفس بس الله لايلومها كل ذا مجتمع وهم في الطريق فقدت شهد الوعي وطاروا بها للمستشفى ودمعت عيون زوجها دموع الفرح قال اكيد حامل<<<<الأخ ناسي أنه ماقد قعد معاها غير ساعة تقطيع الكيك والتصوير
قال الطبيب فيها إرهاق شديد قالت أمه أنا قايلتن لها كلي ونامي وهي رافضة ها شف شاللي جاها <<<<نست يوم أن رقيبتها توجعها ومتسندتن على رجيلات هالضعيفة..المهم قالوا لازم تنويم علشان ترتاح بس العروس تقول قعدة المستشفى أبرك من فلتهم وجمعتهم .
الله لا يلومها ماقالت الا الحق الشاهد قعدت يوم في المستشفى وطلعت وهي ماودها أنهم كتبوا لها خروج وعقبها جلسوا في ابها أسبوع ورجعوا الرياض....
أتمنى انها عجبتكم
منقولـــــــــــــــــــــــــــــــــــــــه
11-05-2006, 03:19 PM
العرض العادي
