السلام عليكم ورحمة الله وبركاته
حنا ضنا مرزوق مع زوغ الابصار=واليا اعتزينا جاك جمع الميامين
ما حدرت نجران واطراف الابحار=تاتي فزوعك مع مثار الدخاخين
والنعم يابني مرزوق ماهيب غريبه عليكم <<<بس صه بلا هياط
سألت ودورت عن الشاعر اللي كتبه .. وبما انها أول مشاركه لي بهذا المنتدى الرائع <<ارجعت للهياط
قلت انزل لكم القصيده كامله......
احم احم .. أقدم بين أيديكم..
قصيده رثاء بلسان الشاعر العجمــي (((دبيان بن حذيان))) في الشيخ المرحوم طيب الله ثراه واسكنه فسيح جناته شيخ الظفير (((نومان بن مانع بن سويط)))
مرحوم يا شيخن تخلده الاذكار=لا حل ذكرن له تباريه نعمين
امن اولا نمدحك في نظم الاشعار=واليوم جينالك بالاشعار ناعين
العذر يالممدوح عن فعل الاقدار=ولا ترانا ضد غيره عصيين
لاجل السويطي نشعل الكون بالثار=ونرد جمع الضد للموت جسرين
حنا ضنا مرزوق مع زوغ الابصار=واليا اعتزينا جاك جمع الميامين
ما حدرت نجران واطراف الابحار=تاتي فزوعك مع مثار الدخاخين
حنا سلاطين المجالس بالاخبار=وحنا شياطين القا للمعادين
لا شك يومك ضمته ذيك الاسطار=وسط الجبين مسجلن دون تخمين
امنت باللي يا هب السمع وابصار=واللي لوجه كلبونا امصلين
انا لوجه كلنا دوم حظار=والحمد له باللين والموقف الشين
واليوم انا ببكيك والدمع مدرار=ولا لايمي ياكود ناس سفيهين
تبكي عليك البيض في سود الاخمار=لا طوحت بالشال من حيفت البين
ويبكي عليك البن يا شيخ وابهار=في مجلسك لا قلطوه السواطين
ويبكي عليك الحر من فوق الاوكار=لامن ذكر مفراسه ايام وسنين
لامن ذكر عانا وراوا و ثرثار=دنق وكنه ينطق اليوم ياسين
وتبكي عليك الدار وصفوف الاحجار=ويبكي عليك امقلطك والدواوين
ويبكي عليك العود لاجاك مسيار=تلقاه بالضحكات مع قولت اهلين
ويبكيك منهو ينقل الطير صقار=لاصاد طيره واذكرك قبل عامين
ويبكي عليك الجار ومجاور الجار=واصحابك اللي عند بيتك قريبين
ويبكونك الظفران في كل الاقطار=اهل الدبش والضان واهل البلاديين
ويبكيك صدقان النوايا هل الكار=ال سويط معقلين المجانين
سم العدا لاراوزت عكش الاوبار=سعد العيون ونومها للمودين
اهل البويت مزبنت كل محتار=عز الضعيف وممنين المخيفين
تاريخهم فحواه طولات وانوار=للي فنا واللي مع الناس حيين
كلن على نومان جاله تعبار=فقيدتن يدما لها القلب والعين
يالله عسا نومان مايقرب النار=وينظر له المولى بحسناه ويعين
ويالله تحسن بالعزا صاحب الدار=وتمكن السلوان بالقلب تمكين
وتمت وصلوا عدد ما طاير طار=على ختام الرسل هم النبيين
وصح لسان الشاعر ورحم الله ابن سويط..
هذي أول مشاركه لي ابي منكم تشجيع
اي نسيت لا أقولكم
البيت اللي عجبني ودي احطه توقيع لي<<<يعني افهومها
اللي وده يسويلي توقيعن زين في ابوي ما أرده
<<<اطراره عيني عينك
ماتقصرون يابني عمي احد يسويلي اياه ويرسله لي ابي لا خلصت امتحاناتي لينه موجود
وبالمناسبه دعواتكم قربت امتحاناتي
...
<<<جعلش الزين مكثر حكيش...
والسلام عليكم ورحمة الله وبركاته ..
أختكم ...
11-06-2006, 06:01 PM
(_*حنا ضنا مرزوق مع زوغ الابصار00 واليا اعتزينا جاك جمع الميامين*_)
العرض الشجري