يامؤمن الريفي انا جيتك زبون
جيتك على مدح اكثر الناس واعنيت
جيت وتعالى الله عما يشركون
لولاه يامؤمن لطبك ماهتديت
اراضي بحكم الله عليمه مايكون
عالج عيوني لو بعد طبك عميت
ودي اخاشر فالبصر من يبصرون
واشوف دربي لاسرحت ولا ضويت
واذا قنصت اثبت مع اللي يثبتون
واشوف طيري كل مااوميت ودعيت
ياكثر مايضرب خويي الطابلون
وياكثر مااكلته مطبات وكليت
ودي اشوف اللي علي يعرضون
وبعض الليالي ودي اسري دون ليت
واشوف ناس(ن) بالقفى مايرحمون
اما وقفت لصاحبي والا مشيت
من دون نظاره ولاهم يحزنون
ياكثر ماكسرت كشمات وشريت
لكن يادكتور جعلك ماتهون
ابغيك كلمة راس دامك مابديت
اسمع ولاابغي اللي وزانك يسمعون
ربي كتب يكشفلك اسراري وجيت
صورة عديل الروح عندك فالعيون
واخاف تقطعها بموسك ماوعيت
ولا عليك امر اطوها تحت الجفون
وعقبه لو تقطع عيوني ماشكيت
هي راس مالي والعرب مايدركون
اني على باب الممات وماحكيت
ياقو قلبي يوم قفن الضعون
اللي على ذاك الموادع مابكيت
وياصبر صبري والعواذل يحسبون
اني دلهت امن الهوى ولا سليت
اسكت عساهم من اسكاتي يسكتون
وانا عن اللي في ضميري ماانتهيت
وادور الفرحه مع اللي يسهرون
وان ذكروني خذت فنجال وسريت
اخذت من وقتك يادكتور العيون
عالج عيوني لو بعد طبك عميت
واستر علي واللي معك لايفطنون
انت الوحيد اللي بعد ربي دريت
للشاعر المتألق
محمد بن فطيس
10-08-2006, 01:16 AM
العرض الشجري