تكفى ترا تكفـى تهـز الرجاجيـل ؟

[راعي الدهما]

هذا البيت من قصيدة الشاعر ( عماش بن عبيد البديري المطيري ) من سكان هجرة العمار بالقصيم .



وهذه قصيدته المتضمنه ذلك البيت كاملة عندما مرت به ضائقه ماليه اثرت عليه .فقالها مسندها لـ مزيد بن سعد المطيري

تكفى ترا تكفـى تهـز الرجاجيـل=ولولا ظروف الوقت ما قلت تكفـى
تكفى يا مزيد ما يبا العلـم تفصيـل=المشكله كبرت على عمـاش تكفـى
ما قلت تكفى غير من فترة الحيـل=وانته ولد من يفعل الطيـب تكفـى
انخاك من كثـر العنـا والبهاذيـل=الفقر حطمني .. وانا ازريت تكفـى
غديت مثل اللي برك ضامه الشيـل=تضحك بي ضعوف الرجاجيل تكفى
يومٍ لك وقفه .. وجاه .. ومداخيـل=ما نغتني عن مثل شـرواك تكفـى
افزع ترا وقتي غـدى كنـه الليـل=والعلم مـا يخفـاك يالقـرم تكفـى
ما عاد بي شده ولا عاد بي حيـل=ضدتني الايـام ... والقـلّ تكفـى
اروح وارجع ما حصلي محاصيـل=والرجل بادت .. يا فتى الجود تكفى
واليوم عندك يا رفيـق المشاكيـل=العذر ما ينفـع وانـا قـول تكفـى
حيثك من اهل الطيب واهل المفاعيل=يا زبن من جاله ومن قـال تكفـى
الجيب فاضي .. واليالـي مقابيـل=عجزت اعيش مع الرجاجيل تكفـى
والراتب المحدود .. يروح تحويـل=من الاداره .. لاهل الديـن تكفـى
حتى عيالي ما قدرت الهـم الكيـل=والازمه لا جات .. صديت تكفـى
ارجى الفرج والله يجيب التساهيـل=واعيش في راحه مع الناس تكفـى
والله كريم .. يبدل الحـال تبديـل=وما قلّ دلّ .. وصامل الهرج تكفى

وسلامتــــكم

أتمني أني أحسنت في الأختيار



تحياتي للجميـــــع



أخوكم

راعي الدهما