الـوجــــــــــــــد

[الرهاوي]

الوجد نوعا من الخيال
فاسمحوا لي ان اسافر مع خيالي
واهديكم هذه الابيات المتواضعه
.
.
.
.

الله من ليلٍ تزايد همومه = يعقد على راسي همومه ويبرم
عينٍ لذيذ النوم عيّت ترومه = وعينٍ تقول بوسطها داخل السم
ياوجد حالي وجد من ضاع يومه = يطرد ورى علمٍ يسره ولا تم
وحيد ابوه ولا يضّيع سلومه = روّح لاجل مستقبله ويتعلم
في ديرةٍ ما قوم اهلها بقومه = غريب دارٍ لليالي تولم
وقامت قرانيس الليالي تحومه = وظروف وقتٍ لا ذكرها تهشم
قال اتصبر واطلب الله بصومه = ويفرج مع الايام ما كان معتم
ويوم الفرج قرّب يحقق حلومه =الله بلاه ببلوة ما ترمم
ثم اطردوه بتهمة له ظلومه = وفصل بعد ما كان فاهم ومهتم
احلامه اللي قد بناها مهدومه= يشوفها قدام عينه تهدم
اخذ ثلاث أيام تبكي رسومه = وان جا يواسى فالبلا ما تكلم
ثم عقبها عوّد لداره وشومه = ومصيبةٍ قدامها مصيبة اعظم
أبوه من سو البخت والشؤومه = ذبح ثلاث عيال والحقهم الام
شايبهم الله سلمه صار بومه = وهو السبب من كثرت الحكي والنم
ويوم احتمى المضراب في كل دومه = خلا عياله وامهم وانحر اليم
وجاهم قضاهم ثم راحوا عدومه = من يد شقردي راعي الطايلة قرم
من نزعةٍ لابليس صوّب سهومه = ومن طاوع الشيطان لا بد يندم
وحطوه في سجنه ولا طاب نومه =لا به انيس له ولا عاد يحلم
الابسيفٍ يفصله عن كمومه =ونارٍ بفوحة ويل قامت تنسم
وعقب شهرينٍ صدّروا فمحكومه =حكم عليه الشرع بالقتل ..واسلم
وشاش الولد قامت تناهض عزومه = بجاهية تكسب مع الطيب ...والنعم
روّح ومعه شيوخ وابنا عمومه = مافيهم اللي يذكرونه بالاهلم
تنطّحوا دارٍ تعجعج سمومه = دار الحكاوي راعي النم والذم
ماهوب كفوٍ لا توفق وقومه = لجاهية سيقت لهم والسبب دم
جوهم وقالوا كلمتين محكومه =قالوا اطلبو باللي تبونه ولاهم
قالوا نبي عشرين مليون كومه = وعشرين جيب وددسنينٍ وبي ام
وعشرين بندق من سلاح الحكومه = وعشرين راس من الابل ماتضرم
ومهلتك ثالث يوم تبدي نجومه =وان كان ماتقدر على حكمنا ...قم
وقام يتلفت ضايعاتٍ علومه = جاهيته ماتمموها على تم
وخلا المكان ودمع عينه رزومه = وعن السوالف والحكاوي تبرطم
شرّق وغرّب من عدامه لهومه = ينصى اجانيبٍ وينصى ولد عم
وقبل الغروب ومهلته بالعمومه = ازرى يوفي فنهم بالمتمم
جاهم بجاه الله ثم جاه قومه = وحب الكتف والكف والخد والخشم
وعيوا عليه وزاد همه غمومه = وجاوب نواح الورق بصياح منهم
غبّر على راسه وشقق هدومه = صايح بصوتا يسمعه كل منصم
كن الحشا تشويه نارٍ ضرومه = وكن العروق يقصها سيفٍ اثلم
وجابوا ابوه مقيدا مع كمومه = في يوم جمعه واكثر الناس ملتم
مركّعينه والحلايا مغمومه =ركع بامر العبد وهوه محرم
ثم اضربه بالسيف باقوى عزومه = الراس طار وغرق الموقع الدم
بكى بكى ثم بكى من يلومه = ابوه عمره من يد العبد يختم
وعوّد لبيتٍ فيه صوت الامومه = عقب الابو ما فارق الروح واسلم
وقدام بيت الام بارت جرومه = قالوا توفت قبل ساعه من الهم
في ظرف يوما واشحٍ بالجهومه =من الابو والام صار متيتم
ودارت به الدنيا ثمانين هومه = ومات ولحق من يومه الاب والام
هذاك وجده مثل وجدي وقومه = من بعد مافارقت صافي المبسم

.
.
أخوكم الرهــــــــــــــــــاوي
.
.