يامير طيرك فالهدد مايجاجي=سو ٍ على الحفال للهاربة عوق
ليا جرد كنه عقاب العواجي= وارخيت من كفك له السبق مطلوق
ماقط شفته عن مهاويه راجي= وماناش بالمخلاب ماهوب معتوق
عديت لها باجوال هاك الهباجي= ارض ٍ خلا مانتب عليها بمسبوق
وادلى بروس خروبها والدجاجي= كنه عديم ٍ غايضينه هل البوق
اشقر وصافي جوهره له وهاجي= ياخذك عن غيره بالاوصاف مفروق
سواد عينه في بياض الحجاجي= فنجال صين ٍ سيق والبن محروق
سود ٍ حداد ٍ في قحوفه لحواجي=عين العديم ان غيض في وجه زاروق
كنه ليا فرع وشاف متفاجي=العاشق الهايم ليا شاف معشوق
تشوف وجهه فاتن ٍ بانبلاجي=ولو لاج والله مايغطي على الموق
ان كان مالك في هداده خراجي=وتلك يبا الملحاق والسبق ماثوق
عقد حجاجه عقب ماهوب راجي=مثل الحشيم اللي على الوجه مصفوق
وتبادلت بينك وبينه مناجي=عذر ٍ ولوم ٍ دار من غير منطوق
تقول خفت من الوعر والعجاجي=وان ضعت عني همي الطاق مطبوق
ياطير عقبك وين يلقا علاجي=القلب لو تقطع قطع منه معلوق
الله لحد مالي بغيرك مزاجي=هدات غيرك لو فعل مالها ذوق
ليا ضربنا مقفرات الفجاجي=ارض ٍ خلا فيها اول العشب مرموق
وتدارجن زرق الغلب فالزراجي=والشمس تو اضفت على القاع بشروق
وعطب الاهاوي عجل تل العناجي=موجب ٍ مع طلعة الشمس مطفوق
وغدالنا في كل روض ٍ مداجي=والريش بين العشب والشمس لاهوق
هذيك غاية فرحتي وابتهاجي=ليا اخذت انا وياك ياطير غدروق
وراع الولع ينسى الحبيب الهجاجي=يبعد به المقناص عن كل مخلوق
وليا سرق عينه لذيذ السهاجي=تعرض له اطياف المقانيص ويفوق
وان قيل طرح الطير صابه خلاجي=تراي كانه ماسجد سهو محقوق
لو هو ثقيل ٍ من وساع الجواجي= ملزوم عقب سهيل يلعب به الشوق
جاي ٍ لهمه في خفاه اعتلاجي=على اشقر ٍ صافي بلا دعج ودقوق
ماجيب مجلوب ٍ لسوق الحراجي=عن منزله منصاه نايف عن السوق
من ماكر ٍ له في علو الرتاجي= سما على كف ٍ ورى ماكره فوق
نايف كما المشعل بهضبة سواجي= يجذبك ضوحه في دجا الليل مشعوق
سوق المحامد فيه ابعرض نتاجي=وشكر ٍ من اعماقي بالاخلاص مرفوق
العرض الشجري