أعتــــــــــــــــــــرافي

[حمد المخيال]

مبروك عليكم الشهر الكريم

وتقبل الله طاعتكم

إعترافي

يالايمي وأن لمت أبمدح كحيلان = فزاع راعي الطيب مدحه عوافي
معنازنا لمن وجه الزمن شان = حمدان ابن مكتوم والعلم وافي
بنظم قصيدي وارسله صوب حمدان = علمي بعيد ومقصد العلم خافي
ياسيدي كف الزمن جاه نقصان = ذاك الجبل ياسيدي مايشافي
عليه غيمٍ وأكثر الناس عميان = نرفع شعار يعيش يوم التجافي
حياتنا تغري سخافات وألوان = عشره يغادرها على أثنين لافي
أجمع معي ياشيخ وكيل في ميزان = أضرب وأبطرح منها علم هافي
ابنتقن الحسبه على كيف ماكان = ومن دون بيب العلم ركب مصافي
أشرب زلال العلم ياطير حوران = فكري له المصدر ومنظوم قافي
واحد وواحد تجتمع صاروا أثنان = وأنا اقول إحدى عشر يالسنافي
حسبه وأبيك أتعيد لاصرت غلطان = أجمع بعد وأطرح ولا تقول كافي
واحد لبس من ثروة النفط تيجان = وواحد بعد يمشي على الأرض حافي
هذا تدين لالفوا البيت ضيفان = واللي لبس تيجان مجلسه طافي
ابشوت تمشي حدرها اجساد ثيران = ياشيخ هذا وقت منهو اسكافي
لاعادبه حشمه وتقدير شيبان = تقديرهم ياشيخ للي خرافي
شفت الفرس ياشيخ قادتلها حصان = لاوالله إلا العلم صار متنافي
هذا على سطح القمر عبر الأزمان = البث ياتي حضرتك حيل صافي
ركب على الموجه بتقاسيم عنوان = وأبحث خفايا موجته فالقوافي
ياشيخ لي دارٍ ولك عدة أوطان= مواطنك بقلوب ناسٍ توافي
اتوق للجيه ولانيب طربان = وجهز علي بمحدبات الرهافي
ودي أجيك وجيتك خير سلوان = تروي غليلٍ يشتكي من جفافي
فزاع أسمٍ مايقدر بالأثمان = زولك في عيني والبلا من خلافي
ياليتني مطلوب دمٍ لديان = ولساحة الإعدام يبدأ زفافي
لني كذا وإلا كذا الوضع سيان = ياحلوها من كف شخص إحترافي
يجيد ضرب العنق من فوق الأمتان = من عقب مايقرئ علينا إعترافي
دينن وابسده ولانيب ندمان = نبي الصباح نسدد ديون شافي
صباح وأحمد واحدٍ منه غفران = وإلا المسا ياشيخ شد اللحافي
الليل ستر اللي شكى الليل بردان = ليل الشتا ياشيخ زاد إرتجافي
أقلب الكفين والفكر حيران= طفيت ناري وأعتذرت لمضافي
كسرت فنجالي وبيعت رسلان = إلك الثقيله وحمل غيرك اخفافي
نبي المسا عندك ولاصبح حقران = مثلك على الطولات ياشيخ وافي

حمد المخيال