جديد عبدالرحمن بن بديع

[ليوناردو دافينشي]

السلام عليكم

بدون مقدمات

جديد الشاعر/ عبدالرحمن بن بديع

يامرسل محمد بعد عيسـى المسيـح=ياللي نصلي لجل هيبتـك ونصـوم
ياواحـد ٍ لارزاق عنـدك ماتبيـح=تحط لي قسم ٍ مـن خيـار القسـوم
وتكشف لي القلب المليح امـن القبيـح=حيث ان وجيه الناس مافيهـا وسـوم
ودّي اقفّل كل باب ٍ منـه ريـح=واقفّل اذني مـن سواليـف الرخـوم
واشري نصيحة صاحب العقل الرجيح=لان النصيحه تنشـرا بيـن القـروم
وياصاحبي لاهنت سـدك لايبيـح=بينتّها وانتـه تظـن انـك كتـوم
ماتدري ان العيـن منطقهـا فصيـح=والصد والاعراض من طبع الخصوم
ومن ضيقتك ماضاقبي الكون الفسيح=ومن صدتك ماني من الرزق محروم
وياخيبتك دامك من الناصـح جريـح=النُصح لاتاخـذه هـم امـن الهمـوم
اثرك مغرر بيـن تطبيـل ومديـح=غرّوك ناسك ليـن عـدّوك النجـوم
ترا ماكل الناس تهـرج بالصحيـح=لكـن لاتنغـر فـي حـب الخشـوم
الناس لاشرهـت تقـول وتستبيـح=حتى ولو ضحكت معك تِلحقك لـوم
انا عطيتك نُصح من قلـبٍ نصيـح=وانت اعتبرت النُصح تجريح وهجوم
وانا معك مخلص ورجالٍ صريـح=لكن تدري قبل كثّـار العلـوم
انا لامنـه صـار قلبـي مستريـح=مالي ورا غـرات خلـق الله لـزوم
من قام حظه قلـت جعلـه مايطيـح=ومن طاح حظه قلت جعلـه مايقـوم

ودمتم