السلام عليكم ورحمة الله وبركاته , الأخوة والأخوات أعضاء وزوار شبكة قبيلة العجمان كما عودناكم على عمل اللقاءات مع ملاك الإبل من أبناء القبيله كان لنا زيارة ولقاء مع السيد / نادر بن نفل بن مصرقع أحد ملاك الإبل في الكويت , وقد كانت الزيارة في بر الصبيه شمال الكويت, وصادف ذاك اليوم انهم شديد ومع ذلك لقينا حفاوة الترحيب من أبو عقيل والغير مستغربه منه , فله كل الشكر على اتاحة الفرصه لنا لعمل هذا اللقاء ونترككم مع اللقاء :
من اليمين : فيصل بن حجرف , سعد بن سمدان , ضيف اللقاء نادر بن مصرقع
س – ابو عجيل متى اقتنيت الإبل ؟
الإبل خلقنا معها ولكن الإبل الشعل اشتريناها من ست سنوات تقريباً وهذي اللي داخل الكويت , والوضح موجوده في وادي العجمان وهي إبل الوالد اطال الله في عمره.
س – لماذا اخترت الشعل بالذات؟
الشعل معروفه بطبعها وممشاها الطيب وهي إبلنا يا أهل الكويت .
س – هل تواجهون صعوبات في دولة الكويت كملاك إبل ؟
نواجه صعوبات ومشاكل كثيره , من أهمها مشكلة العلف وتأخر شركة المطاحن الكويتيه في صرفه بالإضافه إلى أسعاره الخياليه من دون دعم في حين ان المدعوم لا يكفي.
المشكلة الأخرى ضيق الأراضي وذلك بسبب ميادين الرمايه والمنشأت النفطيه والمشاريع الحكوميه.
ايضاً مشكلة المخيمات وكثرتها وتضييقهم على أهل الحلال وتدميرهم للأرض بترك مخلفاتهم . أضف الى ذلك مضايقات البلدية لملاك الإبل .
س – طيب مع كل هذه المشاكل صارت نشب مهيب طرب , فليش ماتطلعون الإبل للسعوديه؟
مثل ماقلت لك هذي الإبل الشعل في الكويت والوضح في السعوديه وهذي للقرب نتونس عندها كل يوم , واذا طبق قانون الرعي الجديد فمالنا بد من الخروج.
س – وماهو قانون الرعي الجديد؟
قانون الرعي الجديد انه يمنع الرعي من خط العبدلي وشرق الى البحر , يعني معاد فيه الا غرب الكويت اللي هي الروضتين والرتق والسالمي , وهذي كلها ميادين رمايه والقاعده الجويه ماخذه نص السالمي.
س – هل تشجع الشباب على إقتناء الإبل ؟ ولماذا؟
الإبل أرثنا وإرث اجدادنا , والإبل تجمع الرجال الطيبين وتعرفكم بهم وتحفظ الشباب من المسالك الرديه وأصبحت في الوقت هذا تجاره , يعني ونسه وفايده.
س – على طاري التجاره يابو عجيل . نلاحظ إرتفاع أسعار الإبل وبشكل رهيب , وش رايك في هذا الإرتفاع؟
والله الإبل تستاهل ومهما دفعت فيها مهيب خساره , وانت لاحظ انه في كل شي طيب دايم فيه غلاء وخصوصا ان الغلاء عام كل شي فليش نستثني الإبل؟. والمزاينات رفعت أسعارها .
س – هل دخلت مزاين او لك نيه للدخول ؟
دخلنا مزاين تبوك فردي وحصلنا على المركز الثالث في القعدان , وان شاءالله ان النيه موجوده لدخول فئة الجمل ومازلنا في طور الانتاج والتطوير.
س – هناك مهرجانات هجيج تقام كل سنه في الكويت , فهل لك نيه المشاركة فيها؟
لا والله الهجيج له أهله وانا مانيب مؤيد له , لاني من نظرتي أشوف انه فيه عذاب للإبل , والإبل مكرمها الله , وحنا ندور الزين ماندور العجله.
س – هل انت تعتمد على المشترى او الإنتاج ؟
كلها , ولكن أعتمادنا على الإنتاج أكثر , لأن الإنتاج هو الأصل وتظهر معك إبل طيبه .
س – وكيف هي طريقة سعيك للإنتاج ؟؟
كان عندنا بعير من إبل الجعيديه والبعير منتج وبناته معنا طيبات وسيمن بأسوام طيبه وأهديته على سيدي صاحب السمو الملكي الأمير فهد بن سلطان بن عبدالعزيز , وهو أكبر من الهدايا لأنه له فضل كبير علينا من بعد الله سبحانه , وأشتريت القعود اللي تشوفونه الأحبش , أشتريته حق من آل فاضل آل مره وهو ولد طياح بعير الشيخ سالم العلي ونأمل فيه خير ان شاءالله , والبعير الأصفر اللي تشوفونه جايني من طويل العمر فهد بن سلطان وهو من إبل حثلين بن سبعان الله يرحمه .
س – كم الأسوام اللي جاتكم؟
والله الأسوام واجد بنات البعير سيمن على خمس الاف دينار وعلى ثلاث الاف دينار ومعنا بكار تسوم على عشره وعلى سبعه , وحنا رياجيل ندور الزين ونقنيه.
س – ماهو مفهوم الزين في نظرة راعي الإبل ؟
الزين له مواصفات للمغاتير وللمجاهيم , اما المغاتير الراس يكون كبير والوجه ضافي والإذن خرعا والرقبه رقيقه وطويله والظهر منفهق , الغارب مارق , العرقوب منهزع , الذيل قصير , اما المجاهيم كل المواصفات اللي طافت ماعدا الإذن تكون مرتكزه والذيل طويل.
س – على ماذا يعتمد الزين , على الناقه ولا على الفحل؟
بالطبع ان الناقه لها دور ولكن الفحل له النسبه الكبيره ولذلك الناس تتعب على الفحول.
س – كلمه أخيره توجهها يابو عجيل لأخوانك وأبنائك اعضاء منتدى شبكة العجمان .
أشكركم على حضوركم وعنوتكم لنا وتو ماتباركت الإبل يوم جيتوها وهذا مجهود طيب إنكم تاصلون أبناء القبيله وين ماكانوا , وأوصي ابنائي واخواني من ابناء القبيله بالمحافظه على موروثهم وموروث ابائهم واجدادهم , والشكر موصول للأخ فيصل بن حجرف على مجهوده الطيب. والله يوفقكم.
عجيل بن نادر بن مصرقع
22-11-2008, 05:09 PM
العرض العادي
