فقدان الطير_مشعل الحبيني

[العجمي تيم]

البارحه ياحسين مركاي كوعي@ من العشا لين اذن الفجر ياحسين

ماغير اسلي خاطري بالدموعي@ مثل الذي من يقضي الدين بالدين

كل السبب طيري حسين الاطبوعي@ النادر اللي شوفته تطرب العين

اللي ليا مني نهمته فزوعي@ مثل الشجاع اليا نهموه القريبين

قمت اتذكر تلته للطلوعي@ بخدن قنصنا فيه حروة اسبوعين

مدري ثمان ايام معهن اسبوعي@ لاشك كنهن يابن الاجواد يومين

وفي تالي المقناص يوم الربوعي@ اتلى العهد به راح يلوى الجناحين

اقفى ورا خرب(ن) مصقر جزوعي@ متذيرن واردفت من عقب طيرين

وسقان معاهن وسط خدن منوعي@ اقف(ن) شمال ومبعدات(ن) عن العين

الخرب صامل والنداوي قطوعي@ حل الوعر دونهن والشعيبين

وقفت ادربل مير مامن سنوعي@ وقالوا جهاز الطير مانسمعه زين

واجهدت رجلي بكل رجم(ن) رفوعي@ ارقى والوح وادبل الصوت صوتين

وماقصروا وقت المنافع اربوعي@ واخذت في اجو القطامي نهارين

لاشك طيري مانوا للرجوعي@ وانا بعد حدرت يم البلادين

ماكان ودي ان المفارق فجوعي@ ليته موادعني سواة المحبين

الله يلوم الطير بعده يلوعي@ خلاني اسهر والمخاليق ممسين

عساه يسلم من يدين الطموعي@ ياللي على النشاد يخفى البراهين

ولا الرجال اللي تعرف السنوعي@ تلقى على حجله مع السبق رقمين

ولا عساه بنازيات الاتنوعي@ ورزقه على اللي خالق الناس من طين

ومما جرى ياحسين قلبي قنوعي@ لو كان عقبه خاطري صاير(ن) شين

وسلامتكم

والله يعوضه باللي اطيب من اللي غدى