................................................بس م الله الرحمن الرحيم............................................
.................................... لااجيــد صياغة المقدمات اتركم مع القصيــــده...........................
................................................. اتمنى اتنال رضاكم واعجابكم.....................................
يقولون وش ردك عليها وش بتقول=وانا اقول ويش اقول في مصدر الهامي
قضيت العمر راجيه والحول يتلا الحول= وطالت على رجواه من عام في عامي
جذبني غرامه واصبح الفكر به مشغول=رماني وصوبني بسهمه وانا رامي
وعشقته على وضح النقا وكل شي أصول=وحبه طبعته بين جلدي والاعظامي
احبه وحبه ياعرب ساري المفعول=وحبه بقلبي ماتغيره الايامي
لي مرني طاريه قمت اتغايا الزول=واقوم اتخيل صورته كنه قدامي
حطيت قلبي والمشاعر رهن وعدول=ورضيت حكمه لو حكمني بالاعدامي
وصنت الوعد واركيت كتفـن يشل حمول=لعيـناه عنيــت الركايب والاقدامي
واليوم ياللي تنشدوني وش انا اقول=انا موقفي واضح وذي بصمة ابهامي
اخلصت له واوفيت والعلم هو المدلول=ومواثيق حبي حفظها عندي الزامي
ولكن خساره ماتوقعتها بتجول=وتجعل هوانا وهم من بين الاوهامي
لفاني الرسول وشيب عيني من المرسول=صدى علمها في الجاش اقوى من الغامي
تقول النصيب وسيف الاقدار لي مسلول=جبرني علي فرقاك والقلب منضامي
وترسل تعاتبني وقالت انا المسئول=ابطيت غايب وانفلت ياعلي لــجامي
وتقول طالت غيبتك مالقيت حلول=وارجو السموحه منك لو خاطري دامي
ولاأدري انا الجاني ولاانا المقتول=ولاانا اللي غيــبته ذنب واجرامــي
انا اقول معقوله لا..لا مهوب معقول=بعتي الموده والغلا برخص الاسوامـي
ومن باعنا بعناه ياناقض المجـدول=خساره وانا اعدك غلا واثمن احلامـي
وانا علي لي قلت بـا اقولها واطـول=زبون المراجل والكرامه والاكرامـي
مدامها الفرقا ودقت لحن وطبـول=روحي في امان الله مانيب لـوامـي
روحي وانا مسامحك عرض الفضا والطول=والله يبيحك كان مااسقيتي الظامي
وداعـة الله واحسبي عذركم مقبول=لوانه على كبـدي كما الميسـم الحــامي
وسلامتكم
للشاعر/ علي بن سران اليامي
17-10-2009, 12:57 AM
العرض الشجري