ما ضاقت الدنيا الوسيعه بأهلها

ناصر العسكر · #1 05-11-2009, 12:43 PM

السلام عليكم ورحمه الله وبركاته

هذى قصيده لشاعر الكبير :احمد الناصر الشايع...

الذى يمتعنا دائما بروائعه التي لا يملّ سماعها..

قصائد درر.. وعطاء كبير من الرقي في الشعر والمفاهيم الابداعية بكل الميادين..

روعة شعرية ومدرسة متميزة في هذا الزمن ..

خذ من سعة.. ليّاك تاخذ من الضيق=

ماضاقت الدنيا الوسيعه باهلها

يرضيك ما يرضي جميع المخاليق=

اللي يجازي كل نفس بعملها

سج القدم والله عليه التوافيق=

واليا جفتك الدار دوّر بدلها

الصبر مفتاح الفرج للمطاليق=

ونفسٍ تعدى حدها من جهلها

كم واحدٍ قد ذاق مر التفاريق=

وعقب الرضا نفسه تزايد زعلها

عليه مالت غرب عقب التشاريق=

وحتى ايش لو مالت على الله عدلها

محد يلوم اهل القلوب المشافيق=

الرجل تركض لين يوقف اجلها

الحب هو ساس الشقا للعشاشيق=

والناس بالايام ياطول املها

من ذاق عشرة لابسات العشاريق=

ما طاعته نفسه لو انه عذلها

الحب كايد والهوى ييبّس الريق=

واهل التغزل لاهيه في غزلها

يا تل قلبي من اصخاف المعاليق=

تل الدلي اللي حيا من رسلها

والماء بعيد بقاعة ام الزرانيق=

والقلب لحم ودم كيف احتملها

قمنا على علم وعهود ومواثيق=

ما نختلف وارزاقنا الله كفلها

راع الهوى بالليل نومه تخافيق=

دارٍ رحل منها ودارٍ نزلها

ترى الهوى قتال ما فيه تلفيق=

ياكم قتل نفس ونفس عزلها

وأصل السبب من هرج بعض المطافيق=

اللي يديه من المروه غسلها

اهل الركاب اللي تذب الطواريق=

تكشف اسرارٍ للعرب وتختلها

لاهم بخياله ولاهم تفافيق=

تدوّر الغرات والله فشلها

علمي بها غربي جبالٍ شواهيق=

في روضة توه يفرخ حجلها

روضه تضاحك بالزهر والزماليق=

يجذب مسافة يوم ريحة نفلها